Markus auf Bairisch

Kapitel 9

1 Und ea hod zu eana gsogd: Heads ma zua: A boa von eich wean ned schdeam, bis dees Reich Goddes mid olla Grafd daherkemma is.

2 Und segs Dog schbaada hod da Jesus an Petrus, an Jakobus und an Johannes mid an Berg auffe gnumma und do warns ganz alloa. Do is a ganz säidsam vawandld woan;

3 und sei Gwand is so hell und weiß woan, wia ma's duach Waschn oda Färbn nia macha kannd.

4 Do is auf oamoi da Elijia mim Mose daherkemma und se ham mim Jesus gred'd.

5 Dann hod da Petrus ogfangd und hod zum Jesus gsogd: Rabbi, do is schee. Bagg mas, bau ma drei Hiddn, oane fia di, oane fia‘n Mose und oane fia’n Elijia.

6 Ea hod neemlich ned gwussd, wos a sunst sogn soid, weil se warn voa Angst no ganz duachananda.

7 Do is a Woiggn kemma und hods ganz schaddig gmachd. Und a Schdimm is aus da Woiggn kemma: Dees is mei liaba Sohn, dem soids zuahean!

8 Und auf amoi, wia se se umgschaud hom, war neamads mea do, außa da Jesus.

9 Wias vom Berg owaganga san, hod eana da Jesus gsogd, dass neamad sogn deafan, wos grod gseng ham, bis ea auferstandn is von de Doodn.

10 Und sie hams Word ghoidn und ham se gfrogd: Wos soidn des sei, aufersteh vo de Doodn?

11 Dann hams'n gfrogd: De Gschdudiadn sogn doch, dass easchd da Elia kemma muas?

12 Und ea hod eana vazäid, dass dees scho schdimmd, dass da Elia davoa kema muas, damid a ois wieda richdig hi biagd. Aba zwengs wos schdähd denn in da Schrifdd dann gschriem, dass da Menschnsohn so vui dalaidn und verachd wern muas?

13 I sogs eich: Da Elia is scho kema, und sie ham mid eam gmachd, wos woidn. Und genauso schdääds in da Schrifdd.

D'Heilung von am Buam, in den da Deife einegfahn is

14 Und se han zu de Jünger kema und do hams an Haufa Gschdudiade gseng, de wo mid eana gschdriddn ham.

15 Soboid de Leid eam gseng ham, wars ganz diaredare, han olle zuawa kema und ham eam griagsd.

16 Nachad hod a‘s gfrogd: Wos schdreidsn a so?

17 Oana vo dene hod gmoand: Du Moasda, i hob da mein Buam midbrochd; in den is anscheinend direggd a Geist einigfahrn.

18 Und oiwei wenn a eam baggd, nacha schmeissd a mein Buam aufn Boodn, dann schaumd a aus’m Mund, gniaschd mid de Zeen und wead ganz schdarr. I hob a scho mid de Jünger gred, dass eam an Deife ausdreim, aba es hod ois nix brochd.

19 Da Jesus hod aba g'andwoad: Sogds amoi, ees unglaibigs Voigg, wia lang soid i eich denn no aushoiddn? Bringdsn zuaba!

20 Dann hams‘n zuawe drong und wia da Deife gschpannd hod, dass des da Jesus is, hod a den Buam grod so umananda baidld, dass a higfoin is und si mid Schaum voam Mund aufn Boodn hin und her gwuzld hod.

21 Do hod da Jesus an Vodda gfrogd, wia lang des scho so gähd. Vo gloa auf, hod a gmoand.

22 Und ofd hod da Deife eam scho ins Wasser oda Feia dauchd, damid a vareggd. Wennsd woasd, wiasd eam häifa konnsd, dann hob doch biddschee Middleid mid uns!

23 Aber da Jesus hod gmoand: Ma ko oiss schaffa, wenn ma grod glabbd.

24 Do hod da Vadda vo dem Buam gschrian: I glaabs da scho; huif mei’m Unglaubn!

25 Wia da Jesus gseng hod, dass d'Leid daher kemma san, hod a an Deife ogschrian und hod eam gsoggd: Schleich di, du schdumma und tauba Geist! Loss den Buam in Ruah und loss di ja nimma bei eam bligga!

26 Dann hod da Deife den Buam hin und  her baidld und is mid am laudn Schrei aus eam aussigfahrn. Und dea Bua is do glegn wia doud.

27 Aba da Jesus hod eam glei aufghoifa.

28 Und wia da Jesus in a Haus ganga is, hamd‘n de Jünger gfrogd: Warum ham mia denn den Dämon ned ausdreim kenna?

29 Und ea hod eana g'andword: So an Dämon ko ma grod duachs Bäddn ausdreim.